ბოლონიაში გამართულ Slow Wine Fair-ში 9 ქართული მარანი მონაწილეობს

23-25 ​​თებერვალს იტალიაში კერძოდ კი ემილია-რომანიის რეგიონის ცენტრში - ქალაქ ბოლონიაში ნატურალური ღვინის ცნობილი ფესტივალი  Slow Wine Fair იმართება. ღონისძიებას ბოლონიის საგამოფენო სივრცე BolognaFiere-ის მე-15 და მე-20 პავილიონები მასპინძლობენ.

Slow wine არის საერთაშორისო ღვინის ფესტივალი, რომელიც ეყრდნობა Slow Food-ის კონცეფციას და მოიაზრებს ეკოლოგიურად სუფთა, როგორც უწოდებენ - ნამდვილი ღვინის წარდგენას გამოფენის სტუმრებისთვის. ეს ფესტივალი სულ ერთი წელია რაც ტარდება. თუმცა, შარშანდელმა გამოფენამ ღვინის ვიზიტორების საკმაოდ დიდი რაოდენობა მიიზიდა, რის გამოც წლევანდელი ფესტივალი ორდღიანის ნაცვლად სამდღიანი გახდა.

ფესტივალმა განსაკუთრებით ბევრი ღვინის ენთუზიასტის, ღვინის მოვაჭრის და ინდუსტრიის პროფესიონალის ყურადღება მიიპყრო, რომლებმაც ბილეთები წინასწარ დაჯავშნეს. Slow Wine Fair წელს ღვინის მცირე მარნებს 26 ქვეყნიდან მასპინძლობს, რაც გლობალური კორონა-პანდემიის შემდეგ სარეკორდო მაჩვენებელია.

23 თებერვალს Slow Wine Fair-ზე მიწვეულნი იყვნენ ღვინის ენთუზიასტები და პროფესიონალები, რათა შეესწავლათ თანამედროვე ღვინის ბაზარი. ღონისძიების მონაწილეები სინჯავდნენ ათასობით ღვინის ნიმუშს მთელი მსოფლიოდან და ღვინის მოყვარულებს ასევე საშუალება ჰქონდათ დასწრებოდნენ მეღვინეობის თემატიკის კონფერენციებს, მონაწილეობა მიეღოთ დისკუსიებში და ღვინის მასტერკლასებში, რომლებსაც მათ ღვინის მწარმოებლები და ექსპერტები სთავაზობდნენ.

ამ მნიშვნელოვან ღონისძიებაში ასოციაცია „ბუნებრივი ღვინოს“ წევრი 9 მცირე მარანი მონაწილეობდა. ეს მარნები გახლავთ:

1. „ნაფერები“
2. „ნიაბის მარანი“
3. „მანავის ღვინოები“
4. „გოცას ღვინო“
5. „ანაპეა“
6. „ანდრიას ღვინო“
7. „კოლაგის“
8. „დორემი“
9. ჩვენი ღვინო

ღვინის იტალიაში ჩატანაში და საკუთრივ ღონისძიებაში მონაწილეობის მიღებაში ამ მარნებს დაეხმარა საქართველოს ღვინის ეროვნული სააგენტო.

ქართველი მეღვინეები ბოლონიის ღვინის სამდღიან ფესტივალს ღონისძიების პირველივე დღიდანვე დადებითად ახასიათებდნენ.

ნიკო ბერიაშვილი, „ნიაბის მარანი“ „ძალიან კარგი ღონისძიებაა. პირველ რიგში, უამრავი ღვინის მოყვარული და პროფესიონალი გავიცანი. ქართული ღვინის წარმოჩენის დიდი გამოცდილება მივიღე. ვფიქრობ, სწორი ხედვაა, რომ ბუნებრივი ღვინო შევუხამოთ ორგანულ საკვებსაც და დავრწმუნდი, რომ ქართული ღვინის ადგილი ევროპის დიდ და ღირსეულ ოჯახშია“

ნიკა ჯეირანაშვილი, „კოლაგის“ მარანი: „ასეთ მასშტაბურ ღონიძიებაზე ჩვენ პირველად ვართ. დაახლოებით 14 ათას ვიზიტორს ვმასპინძლობთ სამი დღის განმავლობაში. მეღვინეების გარდა მსოფლიოს სხვადასხვა ქვეყნებიდან გვსტუმრობენ ჟურნალისტები და ღვინის ექსპერტები. გავიცანით კვებითი დანამატების სპეციალისტებიც. ქართველი მეღვინეები სხვა ქვეყნის ღვინოებსაც ვსინჯავთ და ვადარებთ ჩვენს ღვინოს. სასურველია ვიცოდეთ ეს გემოები, რათა გავერკვეთ, რასთან გვაქვს საქმე და ვინ არიან ჩვენი კონკურენტები ევროპაში. ვეცნობით სხვა ქვეყნების მიდგომებს და მეთოდოლოგიას, რაც ხშირად ძალიან განსხვავდება ჩვენგან. იმედი გვაქვს ვნახავთ იმპორტიორებს, რადგან გვინდა ევროპის ქვეყნებში გავიდეს ჩვენი ღვინოები. ქარვისფერი ღვინის შესახებ სულ უფრო მეტმა ადამიანმა იცის და ეს მნიშვნელოვანია“.

გიორგი აივაზიანი, „მანავის ღვინოები“: „ეს ღონისძიება არის ყველაზე დიდი, რაზეც მე ნამყოფი ვარ. როგორც ორგანიზატორმა გვითხრა, 1050 მარანია წარმოდგენილი. აქედან უდიდესი ნაწილი იტალიიდანაა. არის სექცია, რომელიც გამოყოფილია სხვადასხვა ქვეყნებისთვის და ჩვენ საკმაოდ კარგი ლოკაცია გვაქვს. ვიზიტორიც ბევრია, რადგან შეუძლებელია ამდენი მარნით ცოტა ადამიანი დაინტერესდეს. Slow Food-ის კონცეფცია ეყრდნობა რაც შეიძლება მეტი ცინცხალი პროდუქტის არსებობას როგორ საკვების, ისე სასმელის კუთხით. აქცენტი არ კეთდება რაოდენობაზე. აქ მთავარია ხარისხი. ეს კონეფცია იზიდავს იმ ხალხს, ვინც ფიქრობს ბუნებაზე და ხარისხზე. ეს პირდაპირ ესადაგება იმ თემებს, რასაც ნატურალური მეღვინეობა ქადაგებს. ფესტივალი კარგი პლატფორმაა იმისთვის, რომ იტალიის მსგავს ღვინის ქვეყანაში გავზარდოთ ქართული ღვნის პოპულარიზაცია. ბევრმა იცის, რომ საქართველო არის ღვინის აკვანი, მაგრამ ხშირად არ ეძლევათ ჩვენი ღვინის გასინჯვის საშუალება. საინტერესოა, რომ აქ განსაკუთრებით ქვევრის ჭაჭიანი ღვინით ინტერესდებიან“.

24 თებერვალს

ღონისძიება ექსკლუზიურად ეძღვნება ინდუსტრიის პროფესიონალებს - მყიდველებს, რესტავრატორებს, ღვინის მაღაზიის მფლობელებს, იმპორტიორებს, დისტრიბუტორებს, შეფ-მზარეულებს და სომელიეებს. ეს პროფესიონალები მოწადინებულნი არიან იპოვონ საუკეთესო ღვინის ნიმუშები, რომლებიც შეფასებული იქნება Slow Food-ისა და ექსპერტთა ჯგუფის მიერ.

2025 წლის Slow Wine Fair 25 თებერვალს დასრულდება.

                                                             ლევან სებისკვერაძე